ວັນທີ 27 ກັນຍາ 2024 ນີ້ ບໍລິສັດ ອາລິອັນສ໌ ປະກັນໄພລາວ ຈໍາກັດ ມອບເງິນຊ່ວຍເຫລືອຜູ້ປະສົບໄພນໍ້າຖ້ວມ 100 ລ້ານກີບ ແກ່ ຄະນະກຳມະການຄວບຄຸມໄພພິບັດຂັ້ນສູນກາງ, ຕາງໜ້າມອບໂດຍ ທ່ານ ນາງ ປອ. ແສງອາລຸນ ອິນມີໄຊ, ຮອງ ອຳນວຍການບໍລິສັດ ອາລິອັນສ໌ ປະກັນໄພລາວ ຈຳກັດ ແລະ ຮັບໂດຍທ່ານ ລີປາວ ຢ່າງ ຮອງລັດຖະມົນຕີກະຊວງ ແຮງງານ ແລະ ສະຫວັດດີການສັງຄົມ.
ໃນໄລຍະຜ່ານມາ ຫລັງເກີດໄພນໍ້າຖ້ວມ, ບໍລິສັດ ອາລິອັນສ໌ປະກັນໄພລາວ ຈໍາກັດ ໄດ້ມອບເຄື່ອງຊ່ວຍເຫລືອບັນເທົາທຸກແກ່ຜູ້ປະສົບໄພ ແຂວງຫລວງນໍາທາ ແລະ ຢູ່ ບັນດາບ້ານ ທີ່ປະສົບໄພນໍ້າຖ້ວມ ຂອງ ເມືອງຫາດຊາຍຟອງ, ນະຄອນຫລວງວຽງຈັນ ລວມເປັນມູນຄ່າ 95 ລ້ານກີບ. ນອກນັ້ນ, ສະມາຊິກ ສາມອົງການຈັດຕັ້ງ ມະຫາຊົນ ຂອງບໍລິສັດ ຍັງໄດ້ລະດົມເງິນສ່ວນຕົວຂອງສະມາຊິກ ແລະ ໄດ້ມອບເງິນມູນຄ່າ 6 ລ້ານກີບ ພ້ອມດ້ວຍລະດົມກໍາລັງລົງອານາໄມພື້ນທີປະສົບໄພ ເມືອງຫາດຊາຍຟອງອີກດ້ວຍ.
ບໍລິສັດ ອາລິອັນສ໌ ປະກັນໄພລາວ ຈໍາກັດ ເຫັນຄວາມສໍາຄັນຕໍ່ສິ່ງແວດລ້ອມ ແລະ ເຫັນໄດ້ເຖິງຜົນກະທົບຂອງໄພພິບັດຕ່າງໆ. ບໍລິສັດມີນະໂຍບາຍ ດຳເນີນທຸລະກິດແບບສີຂຽວ ແລະ ຍືນຍົງ, ສົ່ງເສີມສະພາບແວດລ້ອມທີ່ດີ. ບໍລິສັດໄດ້ມີກິດຈະກຳສົ່ງເສີມ ການປູກຕົ້ນໄມ້, ການນໍາໃຊ້ພະລັງງານໄຟຟ້າໃຫ້ເກີດປະສິດພາບ ແລະ ການແຍກເກັບມ້ຽນຂີ້ເຫຍື້ອໃຫ້ເປັນລະບົບລະບຽບ.
